மழையின் விழுதுகள்..

தென்றலை துணைக்கழைத்து 
சாளரம் திறந்து 
மெதுவாய் மெலிதாய் 
உள்நுழைகின்றன 
மழையின் விழுதுகள் 

இவர்களெப்படித்தான் 

அறிகிறார்களோ 

அவள் 

என்னறை நுழைவதை...

♦♦

ஜன்னல் வழியாய் 

மெதுவாய் நுழைந்து 

வெட்க்கத்துடன் உள்ளே வருகின்றன 

மழைத் துளிகள் சில 

முன்பொரு மழைநாளில் 

என்னறை ஜன்னலில் அவள் நின்று 

மழை ரசித்த 

ஞாபகத்தில் வந்திருக்கலாம் 

அடுத்த மழைக்கும் 

வரக்கூடும் துளிகள் சில 

அவளைத் தேடி.. 

♦♦

சாளரம் வழியாய் சன்னமாய் 

கசிந்து வருகிறது 

எப்போதுமவள் விரும்பிக்கேட்கும் 

மெல்லிசையொன்று 

வெளியில் 

கொஞ்சம் கொஞ்சமாய் 

உருவம் தொலைக்கிறது 

சிறு மழையொன்று 

பெருமழையாய் 

உள்ளில் 

சத்தமே இல்லாமல் சலங்கை கட்டி 

பேயாட்டம் ஆடத் தொடங்குகின்றன 

அவளுடனான 

மழைக்கால நினைவுகள்.. 

♦♦

இம்மாத 'தங்கமீன்" இணைய இதழில் வெளிவந்த கிறுக்கல்கள்.